नांदेड दि.26: महानगरपालिकेच्या मुख्य कार्यालय इमारतीच्या वाहनतळातून मनपा कर्मचाऱ्यांची दुचाकी अज्ञात चोरट्याने लंपास केली. ही घटना शुक्रवारी (दि. 25) दुपारी एक ते तीनच्या दरम्यान घडली. वजीराबाद पोलीस ठाण्यात याबाबत लेखी तक्रार नोंदविली आहे.
संजय कामाजी ढवळे हे महानगरपालिकेच्या शिक्षण विभागात जिल्हा समन्वयक म्हणून कार्यरत आहेत. शुक्रवारी सकाळी त्यांनी आपली काळ्या रंगाची पॅशन प्रो दुचाकी (एमएच 26 बीएल 6995) नेहमीप्रमाणे ते कार्यालयात येऊन कामकाज करीत होते. दुपारी एकच्या दरम्यान एका अज्ञात व्यक्तीने आपला चेहरा झाकून महानगरपालिकेच्या तळमजल्यावरील वाहनतळात पायी चालून प्रवेश केला. दुपारी तीनपूर्वी तेथून बाहेर पडताना त्याने ढवळे यांची दुचाकी चोरून नेली. ही घटना महानगरपालिकेच्या सीसीटीव्हीमध्ये कैद झाली आहे.

याप्रकरणी ढवळे यांनी वजीराबाद पोलीस ठाण्यात लेखी तक्रार नोंदविली असून पोलीस या घटनेचा तपास करीत आहेत. दुचाकी पळविताना चोरट्याने आपले तोंड कपड्याने झाकून ठेवले होते. तेथून हा अज्ञात चोरटा छत्रपती शिवाजी महाराज यांच्या पुतळ्याच्या दिशेने पुढे निघून गेला. पुढील फुटेजची पोलिसांनी तपासणी करून चोरट्यांचा शोध लावावा, अशी मागणी ढवळे यांनी केली आहे.